कोल्हापूर न्यूज नेटवर्क
प्रत्येकाला भविष्याची चिंता आहे. त्यासाठी पैसे वाचवणे ही आता गरज बनली आहे. वैद्यकीय आणीबाणी, मुलांचे शिक्षण किंवा निवृत्तीनंतरच्या गरजांसाठी पैसे बचत करणे अनिवार्य आहे. टपाल खात्याच्या वतीने आरडी म्हणजेच रिकरिंग डिपॉझिटल योजना हा बचतीचा उत्तम पर्याय मानली जाते. ही योजना सामान्य आणि मध्यमवर्गीय लोकांना कमी रकमेची बचत करून मोठा निधी निर्माण करण्याची संधी देते.
आरडी म्हणजेच रिकरिंग डिपॉझिट ही एक बचत योजना आहे. यामध्ये तुम्ही दरमहा एक निश्चित रक्कम जमा करता. या रकमेवर व्याज मिळते आणि कालांतराने ही रक्कम मोठ्या रकमेत बदलते. तुम्ही फक्त १०० रुपये दरमहा देऊन आरडी सुरू करू शकता. तुम्ही दरमहा १०,००० रुपये जमा केले आणि हे ५ वर्षे चालू राहिले तर तुम्हाला मॅच्युरिटीवर ७,१३,६५९ रुपये मिळतील. यामध्ये, तुमची ठेव रक्कम ६ लाख रुपये असेल आणि व्याज १,१३,६५९ रुपये असेल. जुलै ते सप्टेंबर २०२५ या तिमाहीसाठी या योजनेला ६.७ टक्के वार्षिक व्याज मिळत आहे, जे दर तीन महिन्यांनी चक्रवाढ होते.
कर्ज ही घेऊ शकता
तुम्ही तुमचे आरडी खाते एका वर्षासाठी चालवले असेल, तर तुम्ही तुमच्या ठेव रकमेच्या ५० % पर्यंत कर्ज देखील घेऊ शकता. मात्र, या कर्जावरील व्याजदर आरडीच्या व्याजदरापेक्षा २ % जास्त असेल.
खाते कसे उघडायचे ?
आरडी खाते उघडण्यासाठी तुम्हाला आधार कार्ड, पॅन कार्ड आणि पासपोर्ट आकाराचा फोटो आवश्यक असेल.दर महिन्याला एकदा रक्कम जमा करणे आवश्यक आहे. तुम्ही वेळेवर पैसे जमा केले नाहीत तर दंड आकारला जातो. आता ही योजना ऑनलाइनदेखील चालवता येते.
योजना कोणासाठी
ही योजना विशेषतः त्यांच्यासाठी फायदेशीर आहे ज्यांना दरमहा थोडीशी बचत करून भविष्याची तयारी करायची आहे. यामध्ये पगारदार कर्मचारी, छोटे व्यापारी, कामगार, गृहिणी आणि विद्यार्थी यांचाही समावेश आहे.
पोस्ट ऑफिस आरडी योजनेचा कालावधी ५ वर्षांचा आहे. परंतु, इच्छित असल्यास ते आणखी ५ वर्षांसाठी वाढवता येते. म्हणजेच ही योजना दीर्घकाळ बचत करण्यासाठी फायदेशीर आहे.
------------------------