सोलापूर : महाराष्ट्रातील प्रख्यात न्यूरोसर्जन डॉ. शिरीष वळसंगकर यांनी अलीकडेच आपल्या राहत्या घरात गोळी झाडून आत्महत्या केली. एका बड्या डॉक्टरने अशाप्रकारे जीवन संपवल्याने वैद्यकीय क्षेत्र हादरून गेलं. ही घटना ताजी असताना आता सोलापुरात आणखी एका डॉक्टरने आत्महत्या केल्याची घटना उघडकीस आली.
सोलापूरात एका नवख्या डॉक्टरने आपला गळा कापून आयुष्याचा शेवट केला आहे. राहत्या घरात त्यांनी आत्महत्या केली आहे. हा प्रकार उघडकीस आल्यानंतर सोलापुरातील वैद्यकीय क्षेत्र पुन्हा एकदा हादरलं आहे. आदित्य नमबियार असे आत्महत्या केलेल्या शिकाऊ डॉक्टरचं नाव आहे. आदित्य याने अलीकडेच एमबीबीएसचं शिक्षण पूर्ण केलं होतं.
MBBS पूर्ण झाल्यानंतर अलीकडेच आदित्यनं शिकाऊ डॉक्टर म्हणून आपल्या कार्याला सुरुवात केली होती. तो सोलापूरात भाड्यानं घर घेऊन राहत होता. दरम्यान, त्याने आपल्या राहत्या घरात गळा कापून घेत आत्महत्या केली आहे. एकीकडे सोलापूरात डॉ. शिरीष वळसंगकर यांचं आत्महत्या प्रकरण गाजत असताना आता शिकाऊ डॉक्टरने अशाप्रकारे आयुष्याचा शेवट केल्याने परिसरात खळबळ उडाली आहे.
या घटनेची माहिती मिळताच पोलीस घटनास्थळी दाखल झाले आहेत. पोलिसांनी मृतदेह ताब्यात घेतला असून शवविच्छेदनासाठी पाठवला आहे. आदित्य याने आत्महत्या नेमकी कशामुळे केली? याची कोणतीही अधिकृत माहिती अद्याप समोर आली नाही. पोलीस या घटनेचा अधिक तपास करत आहेत.
--------------------------------------