कोल्हापूर न्यूज नेटवर्क
ज्येष्ठ इतिहास संशोधक आणि प्रखर विचारवंत डॉ. जयसिंगराव पवार यांच्या निधनामुळे कोल्हापूरच्या शैक्षणिक आणि वैचारिक क्षेत्रातील एक दीपस्तंभ मालवला आहे. राजर्षी शाहू छत्रपती महाराज आणि महाराणी ताराबाई यांच्या देदिप्यमान इतिहासाला पुराव्यानिशी जगासमोर मांडण्याचे अत्यंत मोलाचे कार्य त्यांनी आयुष्यभर केले. डॉ. पवार केवळ एक इतिहासकार नव्हते, तर ते सत्यशोधकी विचारांचे खंदे पुरस्कर्ते आणि मार्गदर्शक होते.
विशेषतः कोल्हापूर जिल्ह्यातील 'राजर्षी शाहू छत्रपती मेमोरियल ट्रस्ट' (शाहू स्मारक ट्रस्ट) साठी त्यांचे योगदान अत्यंत मोलाचे राहिले आहे. ट्रस्टच्या विविध उपक्रमांत आणि राजर्षी शाहू महाराजांचे विचार जगभरात पोहोचवण्यासाठी त्यांनी जिल्हा प्रशासनाला नेहमीच मोलाचे मार्गदर्शन केले. शाहू स्मारकाच्या माध्यमातून राबवल्या जाणाऱ्या शैक्षणिक व सामाजिक उपक्रमांना वैचारिक अधिष्ठान प्राप्त करून देण्यात त्यांचा मोठा वाटा होता. त्यांच्या निधनाने प्रशासनाचा एक हक्काचा मार्गदर्शक हरपला आहे.
शिवाजी विद्यापीठाच्या माध्यमातून त्यांनी संशोधकांची एक मोठी पिढी घडवली असून त्यांच्या निधनाने कोल्हापूर जिल्ह्याची आणि संपूर्ण महाराष्ट्राची कधीही भरून न निघणारी हानी झाली आहे. जिल्हाधिकारी अमोल येडगे यांनी जिल्हा प्रशासनाच्या वतीने त्यांना भावपूर्ण श्रद्धांजली अर्पण केली.
डॉ. जयसिंगराव पवार यांच्या राहत्या घरी जिल्हाधिकारी अमोल येडगे, जिल्हा पोलीस अधीक्षक योगेशकुमार, मुख्य कार्यकारी अधिकारी कार्तिकेयन एस यांनी त्यांच्या पार्थिवावर पुष्प अर्पण केले. तसेच कुटुंबीयांशी संवाद साधला.
-----------------------------
जेष्ठ इतिहास संशोधक प्रा.डॉ. जयसिंगराव पवार अनंतात विलीन ; पंचगंगा घटावर (कोल्हापूर) शासकीय इतमामात अंत्यसंस्कार
--------------------------