मुंबई : TET पेपर फोडणाऱ्या एका मोठ्या आंतरराज्य रॅकेटचा भिवंडी पोलिसांनी पर्दाफाश केला आहे. या प्रकरणी कोनगाव पोलिसांनी धडक कारवाई करत तीन आरोपींना रंगेहाथ बेड्या ठोकल्या आहेत. धक्कादायक बाब म्हणजे, या पेपरसाठी आरोपींनी तब्बल दीड कोटी रुपयांची मागणी केली होती. या प्रकरणाचे गांभीर्य लक्षात घेत सखोल तपासासाठी पोलिसांच्या विशेष तपास पथकाची (SIT) स्थापना करण्यात आली आहे.
परिमंडळ दोनचे पोलीस उपायुक्त (DCP) पवन बनसोड यांना गोपनीय बातमीदाराकडून माहिती मिळाली होती की, उद्या होणाऱ्या टीईटी परीक्षेचे पेपर विकण्यासाठी काही लोक भिवंडीत येणार आहेत. या माहितीच्या आधारे पोलिसांनी कोनगाव पोलीस ठाण्याच्या हद्दीत सकाळी ११ वाजेच्या सुमारास सापळा रचला. यावेळी तिथे पेपर विकण्यासाठी आलेल्या तिघांना पोलिसांच्या पथकाने ताब्यात घेतले.
आरोपींची अंगझडती घेतली असता त्यांच्याकडे उद्या होणाऱ्या टीईटी परीक्षेच्या प्रश्नपत्रिकेचे ४ सेट आढळून आले. पोलिसांनी तात्काळ शिक्षण विभागाच्या वरिष्ठ अधिकाऱ्यांशी संपर्क साधून हे पेपर पडताळून पाहिले. शिक्षण विभागाने त्यांच्या कार्यपद्धतीनुसार (SOP) खात्री करत, जप्त करण्यात आलेले हेच मूळ पेपर असल्याचे स्पष्ट केले.
पोलिसांनी दिलेल्या माहितीनुसार, या पेपर विक्रीसाठी आरोपींनी तब्बल 1.5 कोटी (दीड कोटी) रुपयांची आगाऊ मागणी केली होती. हे पेपर पुढे विविध रकमांमध्ये परीक्षार्थी उमेदवारांना विकले जाणार होते. आरोपींकडून प्रश्नपत्रिकेचे 4 सेट, मोबाईल फोन, डेबिट आणि क्रेडिट कार्ड जप्त करण्यात आले आहेत.
अटक करण्यात आलेले तिन्ही आरोपी परराज्यातील आहेत. यातील एक आरोपी हरियाणाचा तर दोन आरोपी बिहार राज्यातील आहेत. हे तिघेही दिल्लीवरून पेपर घेऊन भिवंडीत आले होते. एका आरोपीने यापूर्वी केंद्रीय विद्यालयात नोकरी लावण्यासाठी दुसऱ्या एका व्यक्तीला पैसे दिल्याची प्राथमिक माहिती पोलिसांच्या हाती लागली आहे. हे आरोपी स्वतः पूर्वी परीक्षा देऊन नापास झाले आहेत.
प्रकरणाचे गांभीर्य आणि यामागील मोठी टोळी असण्याची शक्यता लक्षात घेता, वरिष्ठांच्या आदेशाने एका विशेष तपास पथकाची (SIT) स्थापना करण्यात आली आहे. या पथकाचे प्रमुख म्हणून DCP पवन बनसोड काम पाहतील. त्यांच्या पथकात 2 ACP, 9 अधिकारी (PI, API, PSI) आणि 20 पोलीस कर्मचारी असणार आहेत. या रॅकेटची मुळे शोधण्यासाठी पोलिसांची विविध पथके वेगवेगळ्या राज्यांत रवाना झाली आहेत. पेपर दिल्लीतून कसा आला, यात शिक्षण विभागातील कोणाचा सहभाग आहे का, आणि हे पेपर आणखी कोणाला विकले गेले आहेत का या सर्व अंगाने पोलीस आता सखोल तपास करत आहेत.
--------------------------